早前政府向立法會提交《廣深港高鐵（一地兩檢）條例草案》，嚟緊下周一就會舉行首次會議，不論係建制定泛民都「冧友」加入有關法案委員會，最終到尋晚午夜截止報名為止，近乎全部議員都加入晒法案委員會。
建制派早前已有意派出新民黨主席葉劉淑儀、民建聯議員張國鈞分別出任法案委員會嘅正、副主席，實行主導成個法案委員會以防甩轆。至於泛民方面，一地兩檢關注組召集人、公民黨陳淑莊尋日就公開表態，話有意擔任主席。
陳淑莊除咗話想做主席外，仲批評葉劉、張國鈞兩人係身兼行政會議成員，擔心到時法案委員會會傾側晒去政府嗰邊，甚至操控成個審議嘅步伐。佢仲話，到時會要求召開公聽會，邀請專業團體表達意見，又希望可參觀高鐵西九龍站。
依家兩邊都冧友，開會嘅法定人數就會係廿人或以上，人民力量議員陳志全就警告，話可能會隨時流會。
佢仲鬧爆建制派其實係希望以人數優勢，去爭取法案委員會嘅正、副主席，仲叫佢哋唔好退出或者缺席會議，否則係不負責任喎。