政情：牛鬼蛇神亂港鍾馗護法除妖
香港近年紛紛擾擾一片亂象，違法佔領行動（佔中）拖足三年，佔中發起人戴耀廷、壹傳媒黎智英（漢奸黎）等大部分搞手仲未被檢控，律政司近日仲放生捲入秘密捐款案嘅漢奸黎，令人質疑政治凌駕法治，法治淪亡。有「李漢奸」之稱嘅民主黨創黨主席李柱銘同「民主阿婆」前政務司司長陳方安生又不時去外國「唱衰香港」，乞求外國勢力干預中港內部事務。咁啱得咁蹺，尋日黃大仙區就多咗個鍾馗像，據講係想震懾同捉晒啲「牛鬼蛇神」，為香港帶來安寧。
黃大仙祠監院李耀輝設計
嗇色園黃大仙祠尋日舉行九龍壁綜合大樓落成啟用揭幕典禮，三層高嘅大樓外牆就鑲嵌咗一個用硃砂開咗光嘅鍾馗像，係由黃大仙祠監院李耀輝親自設計。而大樓外邊就有一幅彩繪「九龍壁」陶瓷壁畫，壁畫係仿製「中國三大九龍壁」之一嘅北京故宮九龍壁，係香港目前唯一嘅九龍壁。
鍾馗係中國神話中嘅神祇，專鎮宅驅魔。李耀輝話，佢設計嘅呢個鍾馗好似一隻手想抓住啲嘢，象徵要捉住啲牛鬼蛇神，另一隻手就揸住一把劍，如果牛鬼蛇神作怪，就用呢把劍「侍候」。咁點解要設計鍾馗像呢？李耀輝就解釋，因為三、四年前香港開始立立亂，無論係左派定右派，好多人都為咗私人利益，搞到香港唔得安寧，所以佢就特登請出鍾馗做護法，鎮住呢啲為咗自身利益嘅「牛鬼蛇神」，希望為香港帶來安寧。
李耀輝真係冇講錯，香港近年政治、經濟、民生都被「牛鬼蛇神」搞到立立亂。假難民問題持續影響香港治安，毆鬥、盜竊、非禮樣樣齊，市民人心惶惶；違法佔中破壞香港穩定，民生同經濟都受打擊；港獨分子同本土自決派又擾亂香港政治，青年新政游蕙禎、梁頌恆更喺立法會宣誓時公然辱華同「播獨」，令香港政圈至今不得安寧。
此外，律政司遲遲唔檢控漢奸黎等佔中搞手，近日仲連秘密捐款案都放生漢奸黎同多名涉事泛民人士，但七警同朱經緯就執法變犯法，檢控雙重標準，搞到香港法治淪亡，香港等緊滅亡，難怪要請鍾馗出嚟，震懾同捉晒啲「牛鬼蛇神」，用劍斬妖除魔喇！