冬季流感來勢洶洶，嚴重個案死亡率超過五成，絕對唔係講玩，港府宣布今日起全港幼稚園及小學提早放年假，「切斷感染鏈」，本來係好事，點知推行得太倉卒，結果好事變壞事，又畀人鬧爆咯。
對於突如其來嘅假期，小朋友梗係高興喇，但未必每個家長都咁開心，尤其係基層在職父母，突然要安排人手照顧子女，真係倒瀉籮蟹o架。教育局局長楊潤雄都知衰嘞，拿拿聲補鑊，話學校會照常開放畀有需要託兒嘅家長喎。但正如有小學校長話齋，當局事前全無諮詢，話停課就停課，校方對於如何安排校巴及膳食都好頭痛，而且將無人照顧嘅子弟留喺校內，完全失卻「切斷感染鏈」嘅原意，簡直係搵嚟搞。
所以話啫，港府好學唔學，學人玩「驚喜」喎，以為可以博取掌聲，結果自討沒趣，港產官僚係咪人頭豬腦，仲使問嘅。冇錯，小朋友抵抗力弱，停課係為咗佢哋健康着想，咁做絕對人人贊成，但講真吖，冬季流感大爆發唔係近一、兩日嘅事，連日來已造成兩名兒童不幸死亡，而且教育局對於學校幾時放年假亦一早掌握，點解停課安排唔可以做好啲呢？提早幾日通知學校及家長，咪唔使搞到裙拉褲甩囉。
不過都見怪不怪咯，港產官僚如果做嘢咁有交帶，香港就唔會搞到立立亂喇。淨係講公營醫療吖，呢波疫情導致所有公院人滿為患，醫護人員做到有氣冇碇抖，護士協會忍無可忍喺報紙刊登全版聲明嗌救命，特首林鄭月娥先至臨急臨忙向醫管局撥款五億元救急，有冇再遲啲吖。大家有眼見，流感年年爆發，並唔係無迹可尋，更唔係不可預防，偏偏港府每次都係頭痛醫頭、腳痛醫腳，由床位到預防針再到人手都係急就章，結果就係全無章法，一塌糊塗，直到下一波流感來襲，亂象周而復始，無間循環，點會唔佛都有火吖。
真係諗極唔明，香港假假哋係國際大都市，港府庫房仲要肥到漏油，有乜理由醫療水平仲衰過第三世界？唯一解釋咪就係人嘅問題囉，主事官員個個鼠目寸光，一味抱住少做少錯、唔做唔錯嘅心態辦事，蚊都瞓蛇都死喇。好心啦，唔識就學吓隔籬深圳，人哋政府眼見流感喺學校蔓延，早在去年底已准許學校自行停課兼提早放寒假，結果感染人數即刻回落，呢啲咪叫當機立斷囉。
都係嗰句嘞，居安思危，思則有備，有備無患。可惜吖，由沙士血嘅教訓至今，港產官僚對任何疫情依然掉以輕心，從來冇吸取教訓，想佢哋學識居安思危，不如自求多福好過！