政情：盧金榮盼政府優化導盲犬政策
早前喺一個義工活動見到香港菁英會榮譽主席盧金榮（Wingco），佢話由細到大都有做義工，每次都可以學到唔同嘅嘢，而佢近年同太太就肩負起一個新責任，做咗寄養家庭負責訓練小小導盲犬，但自寄養開始後，先發現導盲犬訓練生喺香港出街受到好多掣肘，盼香港政府快啲優化政策。
訓練時出街多掣肘
Wingco話經手湊過嘅導盲犬唔止一隻，有好多會嚟度假或者短期暫住，而喺開始正式做寄養家庭前，本地嘅導盲犬機構會派人嚟做培訓，教導佢點樣去培訓番導盲犬BB，原來導盲犬要守好多規矩，唔可以亂吠，又唔准隨處便溺，更唔可以玩波，一着起件衫就係返緊工。佢仲話近年導盲犬已經可以出入好多地方，工作方便，大家都有認識，唯獨係受訓練中嘅導盲犬就唔可以周圍走。