政情：爭取產假麥美娟自嘲 無緣享受
小朋友啱啱出世，父母真係需要多啲時間照顧佢，現時四十六歲，仍然係單身嘅立法會議員麥美娟（Alice），都好關心產假問題，佢尋日趁特首林鄭月娥到立法會出席答問環節時，希望為婦女爭取要檢討產假，又自嘲「雖然呢個假期呢，我應該有生之年都唔會有機會享受到」。相信唔少單身女士都同Alice有相同慨嘆！
點名張宇人恨抱孫
Alice問到幾時開始檢討產假，同埋婦女生育嘅時候能否唔扣人工，又點名提到飲食界議員張宇人「呢啲商界嘅朋友都好想抱孫o架」，應該要支持產假安排。
林鄭就話作為首位女性特首，會積極關注女性關心嘅議題，雖然勞福局局長羅致光係男性，但佢亦好關心女性權益，依家對產假嘅研究範圍包括薪金同周數，而勞工權益嘅議題希望先得到勞資雙方嘅共識，以便立法會審議時順利通過。