政情：司馬文僭建廖長江狙擊 葉建源圖護短失敗

廖長江尋日趁特首林鄭月娥第二次出席立法會短問短答環節時，不點名狙擊司馬文僭建問題，批評對方喺呢件事「被質疑牽涉唔少法律責任，受到社會廣泛質疑」，包括購入物業後自行加建，亦有多項未申報僭建，「連被釘契都一直保持僭建」，佢炮轟咁樣反映當事人明知故犯嘅態度。

欲提規程問題阻止不果

就喺呢個時候，葉建源突然向正在主持會議嘅梁君彥提出規程問題，試圖為司馬文護短，指稱廖長江唔應該喺立法會發言影響補選，質疑此舉係咪違反相關規定，梁君彥回應時僅提醒議員注意言論，未有阻止廖長江繼續提問，廖隨後正式提出問題，追問政府會否不偏不倚地跟進所有僭建個案，包括追究相關業主法律責任，林鄭回應指所有涉及高官同名人僭建個案，當局都會依法辦事、一視同仁跟進處理。

其實民主派已非首次為自己人護短，除咗葉建源，上次有司馬文嘅前黨友、大律師兼立法會議員陳淑莊，當日陳淑莊唔單止拒評司馬文僭建事件，更轉移視線批評建制派議員梁美芬，指控對方於咪兜回應事件，係涉嫌喺立法會用立法會資源評論補選候選人。

民主派雙重標準出晒面

與司馬文同樣捲入爭議嘅仲有都係公民黨前成員、現任立法會議員毛孟靜，佢早前亦被揭位於淺水灣道寓所將「車房變住宅」，拖足八年仍未還原，民主派亦一反過去對高官僭建事件窮追猛打嘅高調作風，連小罵都欠奉，幾乎全線噤聲，真係雙重標準到出晒面。除咗司馬文，另一名建築界補選候選人係謝偉銓。