中環出更：過年去邊玩？張俊勇洪為民：照舊
農曆新年將至，唔少人都開始為長假期準備節目，而比較傳統嘅人更已經忙於準備家中事務，以迎接新年到來。不過，中華總商會會董張俊勇同菁英會名譽主席洪為民（Witman），睇嚟就唔使多花心機去計劃喇，事關佢哋話會一切照舊。
早前有政黨舉行盆菜宴，宴請近三千名街坊實行提早拜年，唔少官員都有份出席，好似民政事務局局長劉江華、該局政治助理黎穎瑜（Jade）、政務司司長政治助理蕭嘉怡（Kathy）等，另外亦有唔少區議員到場同街坊聯誼，包括油尖旺區議會副主席黃舒明、區議員陳少棠同黃建新等。
傾開農曆新年去邊度玩？張俊勇話每年新年都會與家人去滑雪，所以今年都會一樣，仲即將出發去瑞士同囡囡滑雪過年添！咁Witman又有乜打算？佢話選擇留港度歲，一如往年同資訊科技界人士喺新年期間行山當行大運，再直落一齊食飯，實行玩足一日，而今年已經約好年初四出發喇！
黎穎瑜帶桔拜年食「撈起」
Jade每年新年都會離港，陪新加坡籍嘅丈夫探親，過一個熱辣辣嘅新年。佢透露，新加坡華人嘅新年習俗同香港類似，同樣會有年糕等賀年食物，但拜年時多數會食「撈起」，即魚生與蔬菜撈埋一齊，仲話一日會食幾次添！另外，新加坡人拜年就唔似香港人要準備禮盒，而係拎隻桔去與長輩拜年，聽落比香港簡單好多喎。
至於喺地區出身嘅Kathy，以往新年前會落區派揮春見街坊，佢直言經多年練習，寫「大吉」就最有信心。而佢已經走入熱廚房，今年就唔會再喺街上題字，但佢就認為寫揮春係傳統，需要畀四歲囡囡接觸，所以早前就同囡囡參加親子班，合作做勞作同寫揮春喇，既可以傳承傳統，又可以親子一番。
卓妮