霸地僭建處處有 澳門特區最離譜

香港有高官霸佔官地三十年,澳門一啲都唔執輸,唔單止霸地時間跨度有得揮,仲出現「此人非彼人,此地非彼地」嘅離奇情節,真係沒有最荒謬,只有更荒謬!

話說澳門路環疊石塘山一個建築項目被質疑審批程序涉嫌違法,廉署尋日公布調查結果,原來相關登記業權人同之後申請繼承嘅居然唔同姓,懷疑有欺詐成分,「外姓人」居然可以順利過骨「繼承」業權,你話係咪匪夷所思吖?

咁都唔止。原來「外姓人」所繼承嘅土地,根本就唔係依家起緊樓嘅路環疊石塘山,而係喺路環舊市區嘅另外一幅地,該地面積只有幾百平方米,同上述疊石塘山工地嘅五萬幾平方米,簡直蚊髀同牛髀。「細屋換大屋」就聽得多啫,「契仔換契爺」真係聞所未聞。如果話豪宅僭建係「小賊」,霸地為王係「大賊」,咁將「地盤」擴展百倍,豈不是葉繼歡都要甘拜下風?如果唔係今次起超高樓項目引發保育爭議,令問題曝光,分分鐘豪宅入伙,有人賺到盆滿缽滿,官老爺仲係懵然不知!

話時話,幾年前歐文龍案東窗事發,一次過將澳門土地審批嘅種種腐敗黑幕暴露人前,今次到底係負責官員瞌眼瞓食塞米,抑或有其他不可告人嘅內情,真係冇人話得埋。

一節知則百節見,澳門金玉其外,敗絮其中,呢單騎呢霸地案只係冰山一角。淨係一個海關,執法不力,搞到成個澳門好似無掩雞籠咁,人蛇可以多次偷渡自出自入,分分鐘釀成治安計時炸彈,澳門市民認真多得佢哋唔少。最離譜嘅係,之前海關人員無理扣查七人外國醫生團體兼態度惡劣,海關唔單止一味死撐,拒不認錯,仲一句「依法及按照工作流程處理」頂番轉頭;之前海關接連兩次倒掛五星旗,話就話已作出處分,但對有關詳情臭屎密冚,慌唔係官官相護玩放生咩。

講開澳門管治亂象,真係三日三夜都數唔完,舊年風災「天鴿」襲澳,搞到死傷慘重,風災後重建又蝸行龜步,唔少地方幾個月後仍然滿目瘡痍,十足十第三世界咁款,「特區政府」變「特拖政府」、「特爛政府」,笑大人個口,其他好似重大基建嚴重超支延誤,高官大搞自肥方案……澳門管治不負責任,唔怪得畀人話衰過清朝喇!

一國兩制兩個特區,香港澳門各有各亂。有人將香港同澳門比喻為北洋艦隊嘅「鎮遠艦」同「定遠艦」,睇得唔打得,結果一隻被日本擄走,一隻自爆沉沒。今時今日香港被洋奴漢奸佔據,澳門毀於自身無能,正正就係歷史嘅翻版。