香港眾志一大群政治小學雞繼史上最年輕議員羅冠聰被ＤＱ後，另一創黨會員周庭連補選入閘資格也被取消，另一「思想家」黃之鋒又官司纏身，出入法院、監獄如吃常餐，睇怕一如周庭，已無緣參選立法會。香港眾志向來以激進出位吸睛，其網頁亦火辣辣宣示港獨思潮，話明香港眾志以「民主自決」為最高綱領，以直接行動，策動公投和非暴力抗爭，推動政經自主；以香港本位，抗擊天朝中共和資本霸權，實踐民主治港的願景。
如此視「一國」如無物，娃娃兵空有烏托邦理念而未能看清當今大局，「抗擊天朝」不自量力至此，何止是雞蛋碰高牆，亦如盲頭烏蠅橫飛亂撞，只會落得「幾個蒼蠅碰壁。嗡嗡叫，幾聲淒厲，幾聲抽泣」，所謂「民主自決」根本就係「自己自決」！而要「推動政經自主」更是戇居，香港畀你哋「自主」，咁就大鑊矣，屆時老朽恐怕連豆都冇粒食！
呢班娃娃兵，淨係識得出嚟遊行示威擺街站，叫市民捐多啲錢。不事生產，同蛀米大蟲有乜分別？一味衝擊搞破壞，隨口亂噏策動公投、抗擊天朝和資本霸權喎，只會令社會更加撕裂、動盪。講真，如果佢哋「實踐民主治港的願景」可以成功，則香港肯定回到淪陷時期的「三年零八個月」，咁就該煨咯！
呢，心水清嘅網民同傳媒，發現一月十七日傳出周庭將會被ＤＱ的消息後，香港眾志在二十四日即鬼祟大幅修改政黨簡介，除了不再自稱「民主自決」是最高綱領，又刪去「天朝中共」，對阿爺忽然咁客氣！
一向高調反中亂港的香港眾志忽然低調修改黨綱，想「洗底」重燃「一整代年輕人的夢想」入立法會？「為文揣摩世好，是無文品」，為政一時激進一時扮溫和，是騎牆無品，你們當香港人、主政者也是小學雞？