政情：拆違法直幡耗46萬 市民焗找數
近年獅子山郊野公園山頭經常被人違法掛上直幡，部分印有「我要真普選」同「守護香港」等政治訴求，漁農自然護理署話過去三年合共有十宗喺郊野公園內非法展示大型直幡嘅個案，部分要出動政府飛行服務隊使用直升機處理，涉及高昂開支，一共花費約四十六萬二千元，最貴一宗耗費逾十萬公帑處理。換言之，又係市民找數。
郊野公園3年10宗
漁護署尋日書面回覆立法會議員陳克勤提問，指一五年、一六年同舊年，分別有三宗、四宗及三宗涉及喺郊野公園內非法展示大型直幡嘅個案。其中一五年一月四日，有一幅長約五米、闊約一米、寫有「我要真普選」嘅黃底黑字直幡懸掛喺西貢蚺蛇尖山頂，需政府飛行服務隊動用三架次直升機花逾三小時處理，未計人員薪酬開支，單係直升機運作成本已高達十萬五千元。
另外，喺舊年十二月三十日有一幅約三米闊、二十五米長、印有「守護香港」嘅直幡出現喺獅子山近獅頭附近，需出動兩架次直升機近兩小時，運作成本超過八萬元，另外需消防處出動四輛消防車、攀山同高空拯救工具等。
未找到涉事者冇拉人
漁護署話根據「郊野公園及特別地區規例」，違法展示直幡或海報等，最高可被判罰二千元及監禁三個月，惟該十宗個案因未能找到涉事人，故未有人被捕及未採取進一步行動。