特首辦公布舊年行政會議次數、討論項目總數及行會成員避席次數，可以見到上屆同今屆行會避席數字有好大差別，今屆行會首半年的避席次數大幅減少，唔知真係冇咁多敏感政策吖，定係行會剛上任，危機意識不足呢？
特首辦資料顯示，舊年上半年，即係上屆行會一共開咗二十三次會議，共討論一百四十八個項目，其中有四十五個項目有成員避席，而避席總次數為一百零九次，以討論項目總數計算，即係平均每個項目有零點七四人避席。
至於舊年下半年，即係現屆行會一共開咗二十二次會，討論項目就較上半年少，只有九十五項，當中共有十四項有成員避席，避席總次數為二十七次，以討論項目總數計算，即係平均每個項目僅得零點二八人避席。
行政會議由問責官員及非官守議員組成，眾所周知，現屆官員缺乏新面孔，當中唔少人都係來自上屆班子或公務員系統，唔知係咪因為咁樣就少咗人要避席？
翻查資料，上屆政府剛上場嘅頭半年，避席次數同樣係大減。到底係因為啱啱開局，冇乜敏感嘢要傾，定係行會成員真係不涉利益衝突，抑或係行會成員危機意識過低，唔知自己要適時避席？真係只有佢哋至知嘞！