政情：泛民擺街站掠水涉非法籌款

守護公義基金1年籌逾300萬

泛民近年遊行成癮，隔三差五就巧立名目搞上街集會，好似舊年咁，一年落嚟大型遊行集會至少有四次，佢哋不厭其煩咁勞師動眾，原因係為咗擺街站捐款。好似由違法佔領行動搞手之一陳健民牽頭成立嘅守護公義基金，幫社民連梁國雄（長毛）、眾志羅冠聰、劉小麗同姚松炎籌官司費，基金單係舊年元旦遊行就「吸金」一百六十三萬元，然後喺同年嘅七一遊行及十月一日嘅「反威權大遊行」，再分別進帳五十四萬元同一百一十萬元，就算今年嘅元旦遊行冇其他政黨願意「科水」而只籌到三十七萬元，基金一年落嚟，淨係遊行籌款已進帳超過三百萬元，實在非常和味。

除咗基金，唔少政黨都靠遊行集會「掠水」，例如由黃之鋒任秘書長嘅眾志，過去一年喺上述遊行再加埋六四晚會，前前後後就籌咗逾一百萬元落袋：社民連仲誇張，同期籌到嘅金額高達一百三十萬元。傳統泛民近期就相對失色，好似公民黨咁，同期就只係籌到五十九萬元，吸金能力完全被比下去。

未獲相關部門批出許可證

泛民明目張膽咁擺街站籌款，原來並未獲得相關部門批准。民政事務局局長劉江華證實，過去五年只批出十六個許可證，但當中嘅非慈善性質籌款活動，並唔涉及公眾集會同遊行。當局又話警方就公眾活動發出嘅不反對通知書中，有提醒不得擅自籌款，如果市民發現任何懷疑未獲發許可證嘅籌款活動，可以向警方舉報，由警方適當跟進，假如證據充分，會依法採取行動添。

翻查資料，部分團體會向食環署申請臨時小販牌照，透過售賣貨品形式，喺遊行路線沿途設置籌款街站，但並唔係全部都會獲批，而且唔少街站只係放籌款箱，實情係「冇貨賣」，所以泛民呢啲街站籌款好大機會係未獲批准，甚至有違法嫌疑添！姚松炎為立法會九龍西補選參選人，另兩名參選人為民建聯嘅鄭泳舜同獨立嘅蔡東洲。