廣東話有句俗語，冇鏡都搵盆水照吓個樣，即係叫人自量吓有幾多斤両。好似有「千古罪人」之稱嘅彭定康咁，明明已經係過氣舊電池，仲以為自己做緊港督，一日到黑扮晒判官，指手畫腳，十足十冤鬼咁，煩都煩死你！
港府呢頭DQ港獨政客，肥彭嗰頭就不甘寂寞加把嘴，去信即將訪華嘅首相文翠珊，內容無非三幅被唱衰香港，敦促佢要求中國政府保證《中英聯合聲明》以及「一國兩制」仍然喺香港有效云云，當正自己係後座司機。
呢嗱，成日話外部勢力喺香港攪局，依家即刻現形嘞。除咗今次DQ風波，之前香港發生大事，肥彭以及一眾英國政客幾乎次次有份，早排有個叫「香港監察」嘅英國人權組織發表報告，對香港事務說三道四，就係最典型例子。可惜吖，肥彭呢位「英國維園阿伯」今次熱臉貼着冷屁股。首相府回信一味打官腔，唔單止冇承諾「發聲」，仲話「歡迎北京對一國兩制作出嘅承諾」，當堂吹到肥彭啤一聲。
冇計啦，吃人的嘴軟，拿人的手短。文翠珊呢期周身唔掂，除咗要應付嚟緊嘅選舉，仲受到黨內逼宮壓力，今次佢帶住成棚工商界大老隨團，就係想喺中國簽一大筆訂單，打救英國經濟嘅同時保住自己嘅相位，中國點止財神爺咁簡單。大家不妨諗吓，之前訪華嘅法國總統馬克龍都要挖空心思氹主人家歡心，又係送駿馬，又係學講普通話，斷估文翠珊唔會咁蠢哪壺不開提哪壺，真係喺習大大面前「關注」「香港問題」啫，吓話！
話時話，本來文翠珊計劃去年十一月訪華，結果被特朗普截胡；諗住成為一八年中國第一位外賓喇，點知半路又殺出個馬克龍，文翠珊訪華日期一推再推，連英國傳媒都忍唔住驚呼英國脫歐搞到地位衰落，中國「棄英取法」。唔理點講都好，時移勢易，英國同中國實力此消彼長，今時今日嘅英國莫講話唔再係「日不落帝國」，連蘇格蘭、北愛爾蘭保唔保得住都成問題，自顧尚且不暇，何德何能干涉人哋內政吖！
當然喇，蔫豬頭都有盲鼻菩薩，唔理英國點樣日落西山，喺香港總有一班崇洋戀殖嘅忠實粉絲，淨係睇吓英國維園阿伯每次嚟香港，一班港英餘孽同反對派政客點樣如蟻附羶，漢奸黎及其「爛果報」點樣肉麻吹捧就知咩事。有啲人喺家鄉無人問津，以為借香港過橋就可以刷存在感，點知一盆冷水照頭淋，結果咪唔衰攞嚟衰囉！
咪話功夫茶唔溫馨提示，牢騷太盛防腸斷。肥彭七十幾歲人，心臟又唔好，唔係好襟激嘅咋！