同民主派以和為貴
建制派提出嘅三項修訂，包括限制議員提出休會議案及臨時動議的數目，至於最辣一項就係經人事編制小組或工務小組通過嘅議程，財委會就唔會討論，只會表決。不過，有建制派早已認為呢項修訂太辣，首先，並非所有建制都係呢兩個小組嘅委員，未能喺小組審議階段提出意見，加上個別喺小組通過嘅議程，再交上財委會時，政府都試過作出讓步，因此就倒不如同民主派「以和為貴」，押後討論呢項修訂。
財委會將會喺下月十日召開特別會議，傾建制派提出嘅辣招，文件顯示最辣嗰項修訂將會押後至日後舉行嘅特別會議上處理，會議日期尚待確定，即係代表有排都唔會處理住，相信都係不了了之居多。唔知咁樣可唔可以減輕特別財會嘅火藥味呢？