政情：時代變遷 單日堅湊孫都要「營」
退休生活有乜嘢好做？如果可以弄孫為樂都唔錯！懲教署前署長單日堅最近榮升爺爺，日日忙住同個孫女玩，仲話湊孫開心過湊仔好多，但佢都話依家湊小朋友同以前好唔同，例如以前冇咁多營養指標，想點湊就點湊。
重拾乒乓球拍 消瘦唔少
依家佢新抱餵緊母乳就話唔可以食朱古力，因為朱古力入面有啲成分會令個小朋友好亢奮，喺飲食方面要小心好多，仲話佢新抱都幾鍾意食朱古力，真係辛苦佢咁話喎。
見單日堅消瘦咗唔少，唔通都係抱孫有關？一問之下，原來佢退休後重拾番乒乓球拍，仲笑笑口話對上一次打乒乓球都已經係中學時代嘅事，雖然當時唔係校隊，但都玩過一段時間，依家退咗休就大概一星期打一次，做番啲運動健康啲。
另外仲會做GYM，喺跑步機上面急步行吓，所以就瘦番啲，不過佢就話因為要湊孫女，所以有時想做運動都冇時間喇！