政情：肥彭陰魂不散對港政指手畫腳
但凡香港有乜嘢政治事件發生，末代港督彭定康（肥彭）都會出嚟抽水，好似香港眾志常委周庭被取消參選立法會港島區補選資格（DQ）後，補選提名期喺周一結束，香港時間同日深夜，肥彭又再越洋對香港事務指手畫腳、說三道四，去信英國首相文翠珊，要求佢喺本周訪華期間為港發聲，對香港政治狀況表達關注。香港回歸二十年，肥彭仍然陰魂不散，不時「回魂」搞搞震，唔通係驚人唔記得佢，要增加曝光率？
英國自由民主黨前黨魁阿什當（Paddy Ashdown）領導嘅人權組織「香港監察（Hong Kong Watch），近來不時發表報告指香港法治、學術自由等受到威脅。阿什當論調同肥彭不相伯仲，齊齊喺英國唱雙簧，今次仲聯署去信文翠珊辦公室，指香港在一九九七年回歸時獲保證的基本自由、人權和自治，面對愈來愈多威脅。二人促請文翠珊強調《中英聯合聲明》和「一國兩制」嘅持續有效性。信中又話：「我們希望……你會給予香港市民一些保證，在我們與中國發展關係的同時，不會賠上我們對他們的義務為代價。」
外交部：堅決反對外國干預港務
針對肥彭同阿什當嘅言論，中國外交部發言人華春瑩回應指香港事務純屬中國內政，中方堅決反對任何外國政府、機構、個人干涉香港事務，而香港回歸以來，一國兩制、港人治港、高度自治嘅方針，得到切實貫徹及落實，重申反對外國政府或個人干預香港事務。
為撈油水 過氣高官乜都加把嘴
香港回歸二十年，肥彭仍然陰魂不散，過去多次返港亦有對港事務指指點點，似係為自己嘅新書谷銷路咁。除咗經常「回魂」對港事務指手畫腳外，佢喺老家英國同港英餘孽一齊唱衰香港，又經常同外號「李漢奸」嘅民主黨創黨主席李柱銘、「民主阿婆」前政務司司長陳方安生等人聯絡，近年亦同佔領行動核心搞手、眾志秘書長黃之鋒等年輕一輩接觸，佢更就「雙學三子」黃之鋒、眾志主席羅冠聰同學聯前秘書長周永康被法院加刑判囚事件去信港府，總之乜嘢都加把嘴。
肥彭對香港仲咁念念不忘為乜嘢呢？正所謂不在其位、不謀其政，佢講再多都只係一個前殖民地嘅過氣高官啫！