中環出更：林健鋒食龍虎鳳（興）到除衫
俗語有云「三六滾一滾，神仙企唔穩」，現今社會就絕對唔鼓吹大家食毛孩，不過內地仍然有唔少人會喺冬天食野味。身兼行政會議成員嘅立法會議員林健鋒（Jeffrey）細數食過嘅古靈精怪食物，例如喺英國食過兔肉同黄麖，講講吓諗起十幾年前喺廣東省食過「龍虎鳳」，仲食到周身滾（興）除晒衫添！
唔敢試蛇血溝飯
一講到食，Jeffrey嘅老饕身份就曝光！佢解釋，平時啲人講嘅「龍虎鳳」係蛇、貓、雞，而佢食過嘅龍係眼鏡王蛇「過山風」，係極其兇猛同好鬥嘅蛇，虎就係果子貍，而鳳就係老鷹。
Jeffrey話好記得嗰一日係一個得攝氏四度嘅日子，間餐廳有一個大瓷鍋，一路喺度滾「龍虎鳳」加藥材，個煲仲可以用嚟打邊爐！佢又話內地人好勁，將蛇血溝飯變「紅飯」，蛇膽就浸酒，但佢就唔敢食呢兩樣，淨係食嗰煲都（興）合合，除剩件恤衫都好暖。咁「龍虎鳳」係乜嘢味？佢只係話「Very Good！」
卓妮