中環出更：梁裕龍普通話半桶水 變行醫信心保證
有浸大學生因不滿校內普通話豁免試合格率低，佔領語文教育中心兼辱罵教師事件引起全城關注。喺日前傑青協會嘅周年宴會，普通話難唔難學就成為一眾傑青嘅熱話，傑青兼眼科醫生嘅梁裕龍自認普通話「半桶水」，但反而成為信心保證。咁奇怪？
梁裕龍話喺○三、○四年時經常返內地工作，但除咗同眼科有關嘅字詞外，其他日常對答都要搵個人嚟幫手翻譯。不過當時香港同內地嘅醫療水平差距大，好多內地人嚟香港求醫時，聽到佢講「半桶水」嘅普通話，就知道佢係貨真價實嘅香港人，係一個「信心保證」！
但佢都補充番，近年香港同內地嘅醫療水平已不相伯仲，香港醫生去內地行醫嘅話都係學好普通話方便啲。
張寶雯：習外語需應用場境
其實唔怪得梁裕龍嘅，事關小學教師張寶雯就喺一間少數族裔學生為主嘅學校任教，深明如果冇應用嘅場境，要學識一種語言係好困難，所以佢啲學生除咗母語同英文，都以學廣東話為先，但佢都強調其實語言識得愈多就愈着數。
至於中學教師王家俊就提到以前喺香港浸會大學讀書時，一定要普通話科合格先畢到業，但佢嘅普通話都實在麻麻地，而且次次都係臨急抱佛腳，考試前先嚟溫習，好彩都順利畢到業。佢仲提醒啲師弟妹，如果對普通話冇信心，都係安排喺第一年讀會好啲，衰咗就第二年嚟過，咁咪唔怕畢唔到業囉！
余嫿唔怕面懵學好廣東話
傑青會主席、時裝設計師余嫿就話自己係雲南人，八歲先嚟到香港定居，普通話有一定根柢，反而係初初嚟香港時唔識廣東話，好在當時細細個唔怕面懵，慢慢學慢慢講，所以今時今日講廣東話同普通話都冇難度！
卓妮