古人話︰弗備難，難必至。冬季流感高峰期已經開始，今年疫潮來勢洶洶，尋日屯門就有一間小學爆發流感，導致過百名學童缺課，唔該當局打醒十二分精神防疫，千祈咪瞌眼瞓，否則後果可大可小！
睇吓數字就知幾誇張。今年至今成人以及兒童嚴重流感個案早已突破一百大關，死亡率更加超過一半。除咗香港之外，呢一波流感潮亦喺全球各地造成好大破壞，好似美國咁，全國五十個州當中，有四十九個連續三個星期出現大量個案，而香港人最鍾意去旅行嘅日本同台灣等地，亦出現嚴重疫情。你知喇，香港係國際大都市，病毒隨住人流傳播，話都冇咁易，當局當務之急係喺各口岸把好防疫第一關。
可惜吖，流感危機殺到埋身，本港衞生官僚防疫一味得把口，淨係識提醒市民注意個人衞生，勤洗手，有感冒迹象戴口罩。鬼唔知阿媽係女人咩，問題係連最基本嘅公立醫院服務，長期以來十個煲得七個蓋，多間醫院嘅急症室服務以至內科病床出現超負荷情況，病人輪急症閒閒哋輪七、八粒鐘，小病都拖到變大病，大病分分鐘變攞命！
講真，公立醫院服務僧多粥少，已經唔係今時今日嘅事，官老爺冇符弗解決都算嘞，仲要衰到畀人踢爆「篤數」粉飾太平，喺流感期間除咗計算常設病床外，仲加入埋短期病床數目為基數，換言之即使病人數目增加，入住率都可以維持相對較低水平。
對於「篤數」指控，官老爺例牌否認，好嘞，就當病床數目真係有所增加，但醫護人手跟唔上都係嘥氣。有護士團體日前喺報章登全版廣告，控訴當局加床唔加人，罔顧前線壓力，而代表業界嘅立法會議員亦表示，家陣一個護士平均要照顧十多個病人，晚上繁忙時間更加要一個對二十幾個，比國際標準嘅一比五至六，相差一大截，前線醫護做到有氣冇碇抖，咁搞法，唔爆大鑊至奇！
正所謂預防勝於治療，正如有醫生形容，流感病毒如果出現變種，就會好似化咗妝咁，可以騙過人類身體嘅免疫系統，喺呢個時候唯一可以做嘅就係盡快接種疫苗。查實唔少國際公共衞生專家已經警告，今年冬季流感嘅嚴重程度可能係五十年一遇，點知港府反應慢九拍，直至兩星期前先呼籲小童及長者等高危人群接種，後知後覺已經夠累事，仲要供應不足，搞到要急急腳入貨，新疫苗話就話二月初抵港，但應唔應付到需求，仲要睇過至知。
始終都係嗰句︰黃台之瓜，何堪再摘。依家香港社會紛紛擾擾，七國咁亂，萬一再爆疫症，分分鐘大鑊過沙士吖！