立法會香港島補選參選人香港眾志常委周庭，尋日正式被選舉主任取消參選資格（DQ），原因係眾志主張「民主自決」，違反《基本法》同「一國兩制」，意味其他眾志成員都參選立法會無望。不過，參加區議會選舉並冇擁護《基本法》及效忠香港特區嘅要求，即係眾志秘書長黃之鋒仲有機會成為區議員。須知參選區議會唔係只睇知名度，要做地區工作同搞吓「蛇齋餅糉」，對民主派有時仲難過選立法會，之鋒如果真係想選，好立即落區做嘢喇！
