政情：約兩靚女設計師食飯 鍾國斌連食詐胡
本來從事製衣業嘅紡織及製衣界立法會議員鍾國斌（Felix）鍾意着行家貨辦，仲識識埋埋唔少時裝設計師，之前仲約咗兩位靚女設計師食飯敍舊添。不過Felix就大呻當日食咗詐胡，唔通兩位靚女設計師齊齊甩佢底？
話說Felix日前喺社交網站上載咗幾張同兩位靚女食飯嘅相，佢話自己十幾年前幫忙成立咗一個年青時裝設計師協會，兩位靚女就係副主席，但個協會成立唔夠一年，「有啲人怕個協會會好強大而阻住」，所以個協會最後都係「食詐胡」冇咗。佢仲話兩位靚女一位啱啱冇做服裝設計，而另一位亦都轉咗行做空姐喇。
食甜品唔夠人 叫唔到「十三么」
而Felix同兩位靚女食晏當日就食多次「詐胡」。事緣嗰間餐廳嘅甜品有「美金」、「人民幣」同「十三么」。「美金」同「人民幣」食落好似威化餅，「十三么」就似布甸，但佢哋得三個人，食唔到十三隻，惟有叫「詐胡」食，即係得六隻牌喎。Felix一連食兩次詐胡，好彩唔使一家賠幾家咋！