政情：嫻姐掌婦委會 繼續狙擊商界

曾斥張宇人立場「極右 最尖酸」

嫻姐過去不時喺最低工資、男士侍產假、標準工時、取消強積金對沖等問題上為勞工發聲、同商界角力。其中Tommy獲委任為行政會議成員時，嫻姐就一度寫專欄批評Tommy係代表「極右、最尖酸」嘅商界立場。相信之前嫻姐退下火線，都令商界鬆一口氣。

不過，嫻姐離開議會冇耐，又再獲委任公職，出任婦委會主席，而兩年任期已經展開。一向關心勞工嘅佢轉個跑道又再狙擊商界，尋日佢就喺電台節目中講到婦女權益，又提到婦女產假應該獲支全薪、同埋要增加婦女產假等。佢又話，七十年代懷孕女性需要左遮右掩，因為擔心會被僱主解僱，雖然依家情況已有改善，但仍然不時有歧視女性嘅事件發生，直言令人感到唏噓。佢又認為，改變舊有觀念同文化困難，其中討論多年嘅釋放婦女勞動力就係例子，覺得要從根本改變，就必須要有魄力、理想、大膽做同捱得打，睇嚟嫻姐雖然卸下議會工作，但戰意仍然非常高昂。

指婦女權益政策涉勞資角力

嫻姐又建議，政府要將託兒問題加入規劃之中，或將社區資源組織好，解決託兒問題，同時亦都為婦女創造就業機會，又話外國已經普遍有共享同回饋嘅觀念，批評香港作為國際都市但就咁守舊，未能做到改變賣地條款同政策，喺發展時提供作社區支援服務用嘅地方。佢仲開宗明義，話改善婦女權益涉及勞資角力同商業考慮，但係如果咁卑微同人性嘅事都做唔到，咁樣到底係政府唔夠重視，定商界唔願配合。嫻姐揚言希望兩年後嘅今日，婦委會可以搵到解決問題嘅政策或措施。

嫻姐方向如此清晰，如果同埋議會中嘅工聯會議員內外夾擊，力量分分鐘更加強大，唔知商界諗到點樣接招未呢？