中環出更：拍拖都幫襯 陳百里硬銷美食車
美食車先導計劃推行將近一年，不過就因為限制太多而屢受批評，經營者更紛紛離場唔玩，搞到政府近日都要研究拆牆鬆綁。主責嘅商務及經濟發展局副局長陳百里自爆，連同太太拍拖都有去幫襯美食車，太太仲幫佢影相打卡添。兩公婆拍拖聽落好似好甜蜜，不過咁樣推廣美食車，會唔會太硬銷呢？
大讚海旁係好去處
陳百里話，上星期同太太二人世界去咗行尖東海旁，專程幫襯美食車，仲由太太幫佢影相打卡，而張相嘅構圖都有諗過度過，希望可以影到最多美食車喺張相入面咁話。而佢哋當日就買咗包同粉麵等作為前菜，陳百里仲講笑話自己嘅作用係包底，要食晒所有食物唔浪費。
除咗幫襯美食車，陳百里又大讚海旁一帶係好去處，除咗行海皮，仲可以去博物館，當日咁啱有露天音樂會，節目都相當豐富。其實平時甚少見到陳百里攜眷出席活動，佢就解釋因為細女得九個月大，太太多數都要照顧小朋友，但如果有適合一家大細嘅活動，佢都會全家總動員參與咁話。聽佢咁講，佢太太都仲肯抽二人世界嘅時間陪佢去視察工作，真係抵得諗喇。
卓妮