中環出更：立會足球賽 議員隊傷兵滿營
立法會足球隊尋日喺石硤尾公園人造草地球場舉行今年首場友誼賽，對戰本地老牌球會南華體育會邀請隊。不過立法會足球隊未開波已經傷兵滿營，其中議員張國鈞（Horace）未戰已經拉傷大腿，勞工界議員何啟明就膝患復發，體育、演藝、文化及出版界議員馬逢國更加係啱啱通完波仔。立法會隊咁樣嘅陣營真係冇眼睇，最終打敗仗都係意料中事喇。
立法會足球隊未開波已經壞消息一籮籮，事關何啟明十幾年前嘅膝傷突然復發，搞到佢跑幾步就要抖一抖。而Horace早前亦都不幸拉傷大腿，尋日一仗都係忍痛出戰。
馬逢國通完波仔照落場
不過最誇張嘅係馬逢國，佢早前先做咗「通波仔」手術，醫生已經講到明唔可以做劇烈運動，不過佢都係應立法會足球隊隊長、漁農界議員何俊賢（高佬賢）邀請嚟到。馬逢國雖然落場唔夠五分鐘就換出場，但都叫誠意可嘉。佢又話，做完手術後少運動，佢就開始減食澱粉質，日常去晚宴更加唔食嘢，結果兩個星期瘦咗十五磅。
講番場波，立法會隊一開波已陷入劣勢，失咗兩球，後來喺好踢得嘅議員梁志祥力壓之下，南華一方竟門前混戰擺烏龍，立法會隊總算追番一球。不過，前鋒贏番都唔夠後防輸，其後立法會隊連輸三球，搞到高佬賢都不禁提醒隊友要專心啲，唔好輸夠「七個一皮」。
陳沛然有速度但輸身位
喺高佬賢鞭策下，立法會隊隨後冇再失波，仲追多一粒，最終以二比五完成賽事。正如高佬賢所講，以如此老弱殘兵面對傳統強隊，成績都叫唔錯喇。而一向將踢波當成副業嘅醫學界議員陳沛然，係少數追得上南華邀請隊球員速度嘅球員。佢事後話，自己依家跑一百米只需十二秒多啲，不過礙於身形單薄，往往都畀對手贏身位，搞到無功而還喎。
卓妮