政情：EF疑雲 泛民預示姚松炎被DQ？
立法會四個議席空缺將於三月十一日進行補選，而民主派及自決派表明要取回四席，近日更以英文名首個字頭合成「PAGE」，E係代表咗Edward，即係姚松炎嘅英文名字頭，點知甩轆，個E字最下一橫飛起咗，搞到盟友大為緊張，驚嗰一橫吹走變咗F，即係馮檢基嘅英文名Frederick字頭。唔通佢哋都預料姚松炎會被DQ？好唔老利喎。
Fb宣傳甩轆 「隱現」馮檢基
話說民主派同自決派嘅司馬文、周庭、范國威同姚松炎都報咗名參加補選，佢哋喺Facebook發起新嘅宣傳，將佢哋四個參選人嘅英文名字頭同埋報名次序 Paul、Agnes、 Gary同Edward，咁啱合成一個「PAGE」字，希望市民支持佢哋全取四席同重返議會，合力為未來打開全新嘅一頁咁話。
原意可能係好嘅，但係個E字最下一橫竟然飛起咗，即刻令佢哋嘅盟友眼都凸埋，有盟友喺Fb直指「E字唔好吹走」呀！議員朱凱廸更加貼文話「E字可否黏實些少？Edward黏唔實被DQ咗，就變 F for Frederick喇。」
最近傳出已報名九龍西補選嘅姚松炎或被DQ，咁吹走E字最後嗰橫變咗F嘅話，咪即係姚松炎被DQ，由民主派初選排第二嘅馮檢基頂上，佢又可以「永續參選」嘞！難怪朱凱廸咁大反應，呢次民主派同自決派真係甩晒轆囉！
司馬文已報名參選建築界功能界別補選，而眾志周庭、新民黨陳家珮亦已報名參與港島區直選補選，新民主同盟范國威、工聯會鄧家彪、報稱獨立嘅陳玉娥同沙田區議員陳國強都報咗名參選新界東補選，而已報名參選九龍西嘅除咗姚松炎，仲有民建聯鄭泳舜。