政情:林正財參觀樂齡科技展 大開眼界

人口老化係香港面對緊嘅問題,安老事務委員會主席林正財尤其關心,佢尋日出席完一個長者活動就急急腳趕去機場,原來係要去日本參觀樂齡科技展。林正財話同類展覽雖然已去過兩三次,但每次都令佢眼界大開,扶抱機同可爬樓梯輪椅等都反映科技應用可令老人家生活更舒適,同時減少照顧者負擔。同場嘅信興教育及慈善基金主席蒙德揚自爆試過一張可將臥床嘅人轉移至輪椅嘅設備,覺得好似玩變形金剛咁得意咁話。

雖然樂齡科技產品令長者生活更便利,但就價錢不菲,未必個個可負擔。

冀政府借鏡日本發服務券

林正財話日本長者會用長期護理保險金租借樂齡產品,其實香港都可以借鏡,考慮由政府發服務券資助長者租用產品。而蒙德揚亦睇好樂齡產品市場發展,仲籌備緊喺年尾嘅電器展劃出專區,展示最新樂齡科技產品。佢又話,研發樂齡科技產品嘅國家好多,不過日本同台灣嘅產品就比較適合港人嘅體形同居住空間喎。

第一手消息請下載on.cc東網iPhone/iPad/Android/Windows Phone Apps