都話假難民無惡不作喇，前日警方先至搗破通州街天橋底「五星級武器庫」，尋日又有調查顯示假難民涉及走私香煙等罪案猖獗，簡直煩不勝煩。睇到喇，舉凡有利可圖，假難民都有殺錯冇放過，香港有乜法子唔亂過黎巴嫩吖！
係人都知，港府一再大幅增加煙稅，目的係想減少煙民數字，保障市民健康。家吓一包煙賣五、六十蚊閒閒哋，加上禁煙範圍不斷擴大，吸煙人口近年終於叫做有所下降，之但係一件好事，偏偏畀假難民搞彎晒。一項國際調查顯示，香港已成為亞洲走私香煙最嚴重嘅城市之一，海關去年仲破獲幾單私煙大案，其中一單已檢獲二百六十萬支私煙，反映走私幾咁活躍，香港淪為私煙港已係不爭嘅事實。
鬼咩，香港之所以淪落至此，原來又係同假難民有關。有關注組織調查發現，本港販賣私煙勾當已被南亞兵團主導，同販毒並列南亞兵團兩大財政收入。本地黑幫貪南亞假難民膽正命平，佢哋就貪有快錢可搵，雙方一拍即合，狼狽為奸。該調查仲顯示，三百名本港受訪者之中，多達九成人認為假難民對香港治安威脅有增無減，破壞社會秩序及加劇黑社會活動，證明市民眼睛雪亮，假難民問題已經忍無可忍。
正如組織代表兼深水埗區議員李梓敬話齋，假難民犯罪無孔不入，主要原因係為咗搵更多快錢，衣錦還鄉，好自然就同本地黑幫行埋一齊。港府以為提高煙稅可以減少煙民數字，減輕醫療負擔，諗法唔錯o架，可惜到頭來事與願違，為南亞幫販賣私煙打開方便之門，煙稅愈高，牟利愈多，你話幾咁諷刺吖。
講真，假難民奸淫擄掠，食大茶飯都冇有怕，販賣私煙算係小兒科囉。呢，去年首十個月持行街紙被捕嘅非華裔人士按月較一五年勁升三成四，每月平均拘捕一百二十五人，連保安局局長李家超都不得不承認假難民犯罪愈演愈烈。梗係喇，賠本生意冇人做，殺頭生意有人做，只要有着數落袋，大鑊嘢又好，細雞嘢又好，假難民通通唔放過，就連偷爛銅爛鐵呢啲低端罪案都照殺，喺佢哋眼中，香港確係遍地黃金，港府又好招待，唔嚟就笨咯。
冇計喇，港府係都要扮好人，係都要中門大開，引狼入室完全係咎由自取。最慘係當局假仁假義，惡果卻要由市民承受，有冇再離譜啲吖。都係嗰句，香港家陣已經係私煙港、販毒港、人蛇港、假難民港、罪惡港，港府仲唔退出公約或重設禁閉營，徹底斬斷假難民來港誘因，唔通真係想香港淪為伊拉克先至安樂？