政情：羅致光老貓燒鬚 畀「二」字考起

話說僱員再培訓局（ERB）搞咗個「ERB名人堂」試讀試工真人Show，首集講述四位名人學員獲配對適合佢哋嘅課程，羅致光係學做茶餐廳廚吧助理，化身夥計嘅佢唔單止要學沖奶茶同紅豆冰，仲要整蛋治、西多士同豬扒飽，睇嚟都有板有眼。

茶餐廳術語 「意粉」咁解

到咗考茶餐廳術語嘞，佢初時好有信心，例如小田同COT，都答中係少甜同凍檸茶，點知見到個「二」字，諗極都諗唔到，仲話最貼切嘅應該係伊麵，又話冇理由淨係嗌伊麵（口架）？終於投降要開估，原來「二」即係意粉，佢聽到答案即刻擰晒頭。唔單止咁，佢話自己嘅記性都OK（口架），點知去送餐嘅時候，連枱號都唔記得添！

眾所周知，羅致光鍾意游水，原來仲有另一個嗜好，佢自爆鍾意沖涼嘅時候唱歌，平日有時間仲會打吓機添！

除咗羅致光之外，另外三名學員包括學整麵包嘅「四眼Cue后」吳安儀，僱員再培訓局主席梁永祥學做健身指導員，而演藝界名人鄭裕玲（Do姐）就學做花店助理。