政情：梁美芬「嫁妹」教梁婉婷生仔打孖上
九龍城區議員梁婉婷日前結婚，同佢同屬經民聯嘅立法會議員梁美芬都有去飲，梁美芬話開心到好似自己「嫁妹」咁。原來梁美芬同梁婉婷相識多年，梁婉婷係梁美芬首次參選立法會時嘅義工，梁美芬仲話婷婷當年着住高跟鞋同佢一齊落區「洗樓」，令佢印象好深刻。事業、家庭都兼顧到嘅梁美芬仲向婷婷分享生仔心得，話如果要生小朋友，就一定要打孖上咁話。
當年教婷婷揀男友
梁美芬話婷婷嘅老公係生意人，當年婷婷拍拖前都有問過佢意見，佢就同婷婷講，如果事業心重，有心從政，有個家庭可以支持自己都係好事，而揀男朋友就唔使要叻過自己，因為香港啲事業型女性已經好叻，所以搵到個接受自己嘅人就得喇！
嫁咗之後係咪好快生B？佢就話都有同婷婷講雖然結咗婚唔一定要生小朋友，但如果生就要生兩個以上，因為如果生一個，小朋友會好依賴父母，作為有事業嘅媽媽就好難分身。育有兩子嘅梁美芬仲自爆，佢曾經都想生五個小朋友添！