政情：質疑懲教虐囚張超雄自取其辱
立法會成功修改《議事規則》，大減民主派拉布搞事嘅機會後，議會秩序終於逐步回復正常，各黨派議員重新透過唇槍舌劍嚟分高下，而唔係單靠掟嘢同點人數嚟博出位。建制派喺本周一連兩日嘅立法會大會更進行大反擊，繼前日連環炮轟議會陣線毛孟靜嘅「車房變住宅」醜聞，尋日等到工黨張超雄提出動議，要求傳召懲教署署長交代虐囚問題時，建制派又大翻民主派濫用「公務探訪」制度探自己友嘅舊帳，狠批佢哋浪費懲教署資源。
民主派早前為咗阻撓修改《議事規則》，提出咗大批要求譴責建制派議員同傳召政府官員作供嘅拉布議案，但隨着拉布行動失敗收場，部分人其後已知衰自行撤回議案，以免浪費大家時間，唯獨係張超雄、會計界梁繼昌、公民黨陳淑莊同議會陣線朱凱廸堅拒「自撤」。
張超雄尋日喺會上指出，早前有報道指不少在囚人士受到虐待，唔少仲係少年犯，因此要求傳召懲教署署長到立法會交代。社福界邵家臻亦指，民主派曾就在囚人士被虐事件要求與當局會面，但遭到政府冷待，所以支持有關動議。
被議員反指濫用公務探訪
不過，身兼立法會保安事務委員會主席嘅民建聯陳克勤就反駁，有關報道大部分投訴人都蒙晒面，難以得知係投訴緊邊個監倉，懲教署好難跟進調查。佢又話自己都去過幾次公務探訪，問及在囚人士嘅獄中待遇，獲得嘅回覆都好正面。
工聯會麥美娟其後接力指，早前亦有傳媒報道過，話有議員多次以公務探訪方式、輪流到不同懲教院所探望在囚社運人士，耗用懲教署大量人力物力，「懲教署人員要應酬你咪好唔得閒？」希望有關議員唔好再咁做，等懲教人員有時間做番其他正經嘢。須知有關探監行動，正正就係由張超雄同邵家臻發起，多名民主派議員都有參與，麥美娟好明顯係鬧緊佢哋。
保安局副局長區志光回應時更踢爆，過去曾安排議員到監獄探訪，但張超雄近日卻回覆當局，話歌連臣角懲教所位置偏遠。陳克勤亦透露，保安事務委員會最近兩次討論懲教相關事宜，張超雄都冇嚟開會，令人質疑佢究竟有幾關心一般嘅在囚人士。動議最後一如所料以大比數否決，張超雄今次真係自取其辱喇！
四懲教協會發聲明斥誣衊
喺立法會辯論期間，四個懲教署協會發表聲明，強烈反對喺沒有實質證據下，單方面不斷指控懲教人員濫用職權虐囚，質疑有關人士針對及誣衊懲教人員，刻意干預懲教工作，以達到其政治目的。聲明又話，署方一直強烈建議有關人士將事件轉交警方處理，以還懲教人員一個公道，然而喺警方調查期間，該等議員仍不斷提出有關指控，實有妨礙警方調查之嫌。