中環出更：補選請外判司機 要連踩25句鐘

司機憂體力不繼變公路炸彈

有司機擔心，若當日同一人連續駕駛二十五個鐘以上，體力上未必能支持，等同疲勞駕駛，隨時變成公路炸彈。總選舉事務主任黃思文究竟有冇諗清楚（口架）？

近日客貨車電召App「GoGoVan」上，刊登咗一則租用客貨車連司機嘅「包鐘」工作。呢份工長達二十五個鐘，工作時間係三月十一日早上六點四十五分至翌日早上七點四十五分，被分派到沙田、上環等唔同地區工作。我哋依據聯絡方法詢問負責人詳情，竟發現工作原來係由選舉事務處委託，司機主要職責係喺投票日，運送選舉物資來往各投票站。

負責人回覆嘅訊息仲話司機當日需要喺各區票站等候，並需要長時間等候工作，以「進行同區選舉站物資支援或特（突）發事件備用等」，仲有可能要跨區工作。

選舉處：冇規定同一人操作

選舉事務處發言人冇正面回應，該工作有可能引致司機疲勞駕駛的潛在危險，亦有拒絕同一司機連續二十五個鐘工作，只係回覆話按招標要求，合約條件冇規定運輸車輛須由同一司機連續操作，服務供應商可因應實際情況安排司機輪班工作。我哋向GoGoVan查詢，負責人允許司機一人工作二十五個鐘，包鐘司機亦可搵人頂更。

卓妮