中環出更：當局增「濕地補償」 蔣麗芸：畀邊個？
落馬洲河套區正計劃建設港深創新及科技園，計劃中會影響部分濕地，當局會喺嗰區增加濕地補償。立法會工商事務委員會尋日開會商討發展落馬洲河套區前期工程及第一期主體工程時，立法會議員蔣麗芸似乎相當關心，問到「濕地補償畀邊個？」
土拓署解畫：生態補償
發展局副局長廖振新就即刻笑笑口，請土木工程拓展署西拓展處處長張少猷代為回答。張少猷都好認真咁嘗試解釋乜嘢叫「濕地補償」，佢話第一期主體工程受影響嘅魚塘有一定嘅生態價值，為咗保持生態價值情況，會因應損失嘅魚塘補償生態價值，係生態方面嘅補償嚟嘅。
除咗濕地外，當局又提到，該處有局部地方涉及污泥，污染量唔多，污染水平亦唔高，相關處理粗略估計涉及約六千萬元。
可能因為依家好多政府工程都超支，另一議員黃定光就問政府能唔能夠保證唔會再就今次嘅工程申請追加撥款，又話：「我都怕咗撥完之後唔夠又再撥，好麻煩」，廖振新回應話估計係基於市場最新情況，若市場無大變化，對撥款有信心喎。
卓妮