踏入新一年冇耐啫，加風又四起嘞，搶先加價嘅係房協，四月一日起調高轄下二十個出租屋邨共三萬二千多戶嘅租金八個巴仙，維持兩年喎，你話基層市民係咪百上加斤吖。
嗱，房協話就話加租後每戶平均多繳一百五十九元，變成每月平均二千一百多元，好似濕濕碎咁款，實情係小數怕長計，何況住得喺資助房屋嘅全部係基層市民，加租八個巴仙絕對唔嘢小，遠超通脹唔在講，打工仔人工幾年下來都冇呢個加幅，就知房協幾咁狼胎。仲有呀，房協九月起實施富戶政策，超出資產上限嘅新租戶或轉名畀非戶主配偶嘅租戶，隨時要交雙倍租金甚至被收回單位，會唔會引起糾紛，真係講唔埋。
鬼咩，房協一味喊窮，聲稱工資及維修保養開支不斷上升，經營成本上漲，加上多個屋邨老化，需要投放大量資源保養維修，講到加租為勢所逼咁款，偏偏對參與興建居屋有錢落袋隻字不提，唔係縮骨係乜吖。有人就講得啱嘞，今次已經係房協十年內第四次加租，次次藉口都大同小異，擺明係欲加之價，何患無辭咋。
咪以為加租好閒喎，正所謂一加俱加，好似港鐵一加價，其他交通工具必定跟隨一樣，今勻私樓業主仲唔大條道理飛擒大咬咩。仲有喎，既然公營機構都帶頭加價咯，其他行業會執輸至奇，結果必然係衣食住行乜都加。呢，話口未完啫，教育局又批准自資院校下學年加學費嘞，部分課程加幅仲高達兩成添，問你點頂。
咁就唔怪得歌神首《加價熱潮》永不過時喇，「糖又加，鹽又加，成日咁加任佢話」，小市民唔怕怕至奇。冇計嘞，香港就係咁荒謬，既係窮人地獄，又係富人天堂。一方面窮人想有片瓦遮頭求之不得，搞到劏房遍地開花；另一方面富豪權貴有豪宅住仲唔心足，係都要違法向高空地下發展，貧富懸殊愈演愈烈，呢啲咪就係現代版「朱門酒肉臭，路有凍死骨」囉。
講來講去，最衰格都係港府。唔係咩，財爺陳茂波呢頭話今個財政年度首八個月嘅綜合盈餘高達五百七十多億元，較原來預測嘅一百六十幾億元高出多倍，財政儲備隨時衝破一萬一千億元大關；嗰頭又撳住荷包唔願放水，放風話嚟緊嘅財政預算案「三不搞」，包括唔搞代繳公屋租金喎，有冇再離譜啲吖。
睇到喇，今時今日嘅香港，衣食住行皆不易，生老病死樣樣難，港府帶頭加價之餘仲要做守財奴咯喎，即係唔理小市民死活嘅咋。遇着呢啲咁嘅涼薄政府，市民想新年快樂都幾難咯！