政情：建築界補選 泛民料轉推司馬文
被取消立法會議員資格嘅姚松炎已轉戰民主派九龍西補選嘅初選，民主派早前傳出由年輕女性城市規劃師林芷筠出戰立法會建築界補選，但隨着補選提名期臨近，據悉民主派又再轉人，最新決定由南區區議員司馬文出戰，挑戰建制陣營兼建築界前議員謝偉銓，原因係司馬文嘅得票「成績」比前議員姚松炎更高喎。
曾為特首選委戰中「票王」
據了解，民主派係考慮到司馬文喺一六年嘅特首選委戰中，喺建築界成為「票王」，獲得二千五百四十二票，較姚松炎同年勝出立法會建築界選舉嘅二千四百九十一票更多，因此喺業界政治氣氛未有大變動下，有信心司馬文能重現選委一戰嘅吸票能力。司馬文接受查詢時話對參與補選態度積極；而姚松炎就指司馬文不屬建築、測量等界別，反而能令四個界別嘅選民放下門戶之見。
不過，司馬文喺過去參選立法會往績都唔理想，佢喺○八年參選旅遊界功能界別低票落選，之後喺一二年挑戰俗稱「超級區議會」嘅區議會（第二）功能界別，但因提名不足無法參選，而佢喺一六年再度挑戰超級區議會同樣未能取得足夠提名，並轉戰香港島直選，但支持度一直不高，最終喺投票前棄選。