政情：政府推智慧城市 立會壞咪倒米
政府早前公布香港智慧城市藍圖，目標係將香港打造成智慧城市。立法會議員盧偉國（WK）尋日喺立法會大會就政府建設智慧城市提出質詢，仲問創新及科技局局長楊偉雄當局點樣喺有關工作發揮統籌同促進作用。不過，議員發言時立法會個咪就多次失靈，唔係發出「嗞嗞」響嘅電流聲，就係冇聲，連代主席李慧琼（Starry）都要叫立法會技術人員留意下啲咪嘅情況。立法會咪都壞埋，又點講智慧城市呢？
唔知係唔係因為天氣凍，影響器材，立法會個咪屢次出現問題。喺立法會議員譚文豪問楊偉雄點樣利用政府收集返嚟嘅數據時，佢個咪就發出「嗞嗞聲」，Starry就問係咪今日啲咪嘅感應有問題，叫技術人員要留意。
何啟明扯火話做法「累街坊」
不過，轉頭到勞工界議員何啟明提問時，個咪又再出現「嗞嗞聲」。可能因為一開波畀人窒住道氣，何啟明就突然扯火，仲話政府收集完數據，又要各部門自行研發應用程式，市民先可以獲取資訊，做法等同「累街坊」咁話。楊偉雄就回應話政府推動智慧城市發展，創科局會幫助各部門推行政策喎。