中環出更：李國章斥《南華早報》寫假新聞
香港大學校長馬斐森將於本月底就會執包袱離任，準備去蘇格蘭愛丁堡大學做校長，臨別依依，佢早前接受《南華早報》訪問時透露，任內經常受到中聯辦干預。港大校委會主席李國章尋日直斥《南華早報》有關報道「係假新聞」，又引述馬斐森指被《南華早報》錯誤引述其言論。
李國章尋日接受立法會前議員劉慧卿訪問，當提及《南華早報》有關馬斐森的訪問時，李國章即刻話「係假新聞」，佢從未聽過馬斐森受到壓力或中聯辦干預，所以佢睇完報道都嚇一跳，於是就此事向馬斐森了解。李引述馬斐森指自己係喺訪問中被問及係咪經常喺壓力下工作，馬就回答係經常，馬又被問及係咪曾接獲中聯辦嘅意見，但《南華早報》將兩者混為一談。
李國章否認港大受到中聯辦干預，無奈指「溝通就話係干預，唔溝通又話唔溝通」，佢唔會視意見為干預，中聯辦教你點做先係干預。
爆馬斐森做咗兩年就斟續約
對於馬斐森喺專訪講到做咗四年，但李國章冇同佢傾續約所以先走，李國章爆料話對於喺一四年四月上任，任期至一九年四月，對方到今個月都未做夠四年，但對方喺一六年搵過佢話想續多五年約，嗰陣就講明起碼做夠三年半到四年先傾喇，點知幾個月後對方就話接受咗蘇格蘭愛丁堡大學嘅聘約。佢仲話如果對自己有信心係做得好，其實好難炒校長，冇人打算炒人，只係跟規矩做夠年期先開始傾。至於點評價馬斐森，佢就話對方做嘢唔夠仔細，但唔係話對方差，對方喺好多地方上都做咗好多工夫。
卓妮