中環出更：授食安秘笈陳細潔：生冷嘢唔凍唔食
每逢年頭年尾就會有好多派對兼且好多人外遊，唔少人亦乘機狂食生蠔、海鮮同魚生。不過，早排有人食咗法國入口生蠔食物中毒，要大批回收，真係要小心病從口入嘞！日前適逢係保良局百周年紀念盃賽，唔少名人都去沙田馬場支持吓，卓妮見到保良局主席陳細潔（Abbie）同班義工準備咗好多意頭嘢，一齊義賣籌款。Abbie都話好鍾意食生蠔，去旅行時見到啲嘢食好吸引，但佢驚食錯嘢會出事，所以都唔敢亂食嘢。
Abbie諗番起一個經歷，話之前喺香港一間由日本人打理嘅餐廳食魚生，以為好安全，點知食完就上吐下瀉，所以以後食嘢都好小心。佢仲傳授食物安全秘笈，話食生冷嘢要留意兩樣嘢，首先一定要夠凍，唔凍唔好揀，第二放入口覺得個味唔同咗，就千祈唔好吞，唔係一食就好快出事。佢話如果去旅行亂食嘢，有事就會浪費晒個假期。
保安局局長李家超嘅太太就試過外遊食錯嘢出事，佢話之前去旅行食咗啲唔熟嘅串燒，之後仲要去醫院，搞到個假期要喺酒店房度過，雖則有老公陪住，但都係唔好亂食嘢，呼籲大家要小心避免病從口入。同場仲見到中電企業發展總裁莊偉茵（Quince）同「業餘大廚」老公黃楚權，老公咁識煮，兩公婆外出食嘢就當然好小心喇！
王政芝從政 老公力撐
咁啱見到新民黨青委會執行副主席王政芝（Gigi）翹實老公黃文揚入場，Gigi話係嚟支持吓朋友。問到老婆從政老公撐唔撐？黃文揚即刻話支持，無論老婆有乜嘢決定都支持，仲話因為老婆從政，依家就多咗人留意佢哋。由頭到尾Gigi都翹實老公唔放手，小鳥依人咁，真係打風都吹唔甩喇！
卓妮