香港政府除咗銀紙多，最多就係發展口號，乜乜中心物物港，咁多年嚟數到天光都數唔晒。呢嗱，港府家陣又話要喺深水埗通州街打造設計及時裝基地，聽落都幾好，但到底會唔會又係好似之前咁煲無米粥，大家只能拭目以待。
計劃中嘅設計及時裝基地位於通州街市區重建局項目，初步計劃樓高五層，當中包括服飾展示區、時裝製作工場、設計圖書館、協作空間以及創業培育空間等，同時基地亦會成為香港設計中心目前兩項培育計劃嘅地點，為新進設計師提供創作空間。大家可以睇到，深水埗係傳統嘅製衣業中心，聚集眾多買手之餘，部分設計師亦會前來攞靈感，基地揀喺深水埗區落戶，總算係貼題。再講吖，時裝除咗本身係一個龐大嘅產業，連同相關上、下游產業，經濟效益絕對唔講得笑，睇吓南韓首爾一年一度嘅時裝周幾咁威水就知。
仲有一樣嘢好緊要，深水埗係全港最貧窮嘅舊區之一，居民以基層為主，如果可以借時裝基地帶旺當地經濟，絕對可以走出「市區重建」喺拆卸重建之外嘅另一條血路，起碼唔使好似旺角波鞋街咁樣，開頭吹到天花龍鳳，點知最後又係變咗連鎖名牌店商場。
當然喇，藍圖再理想，港產官僚眼高手低都係嘥氣。唔講大家可能唔記得，原來「國際設計及時裝中心」正正係當年老董提出「乜乜中心」嘅其中之一，結果係點大家有目共睹。唔怕唔識貨，最怕貨比貨，香港近年原地踏步，不進反退，反而深圳埋頭苦幹，發展一日千里，香港高新科技園區淪為地產項目，人哋就成功吸引大批龍頭科技企業，贏得「中國硅谷」美譽，簡直相形見絀。
講番設計及時裝基地呢壇嘢，其實仲有好多實際問題要解決，例如原本喺俗稱「棚仔」嘅臨時布販市場做開生意嘅攤販，當局就有必要作合理安置。講到呢度，功夫茶真係火都嚟埋。對於有攤販要求繼續喺基地營業，商經局局長邱騰華一句「基地目標、對象同『棚仔』唔一樣」就封晒大門。不過咁，咪睇官老爺對住小商販兇神惡煞，一副公事公辦嘅架勢，對住五大三粗嘅假難民兵團，佢哋即時變為鵪鶉。通州街天橋被假難民攻陷多年，佢哋為非作歹，橫行霸道，搞到附近街坊雞毛鴨血，如果當局拎出驅趕「棚仔」攤販一半嘅魄力同決心，問題一早迎刃而解喇！
講多無謂行動最實際，要發展時裝基地，先剷除罪惡溫床。咪一陣呢邊廂模特兒行天橋，那邊廂南亞兵團斬雞頭、燒黃紙，舉行黑幫入會大典，咁就大殺風景喇！