政情：馬清楠留學歲月 打欖球禦寒
喺啱啱過去嘅元旦日，好多人經過除夕倒數狂歡之後，都選擇同家人溫馨悠閒咁度過。保良局副主席馬清楠（CN）就去咗觀賞青少年欖球錦標賽，原來保良局兒童住宿中心嘅女學生都有參賽，CN仲為十九歲以下組別賽事擔任頒獎嘉賓。CN見到學生喺球場競技，不期然諗番起自己喺英國讀中學時打欖球嘅趣事。
CN話英國嘅學校好注重學生嘅體育同音樂發展，通常上晝讀書，下晝就全校出晒去打波、做運動。記得當時冬天玩欖球，天氣好凍，佢為咗取暖，唔跑唔得，所以就好投入咁玩，結果愈玩愈起勁，唔止樂在其中，後來仲入埋校隊添！
鍛煉毅力及團隊精神
佢笑笑口話運動嘅好處多多，唔止強身健體，仲可以鍛煉一個人嘅毅力及團隊精神，所以保良局好支持香港欖球總會喺校園推廣欖球嘅計劃，現時已於逾廿五間保良局中、小學向逾四千名學童介紹欖球運動，希望可以藉此幫助學童建立自信同發展生活技能。