政情：行會成員舉牌請願葉劉角色混亂
身兼行政會議成員嘅新民黨立法會議員葉劉淑儀近排曝光率極高，先喺舊年底自爆被恐嚇，之後立法會修改《議事規則》如火如荼之際，佢又企起身支持泛民嘅「最後呈請書」查領展。尋日喺召開行會前，佢竟然變身示威者，喺示威區舉牌請願，開創行會成員都要請願表訴求嘅先河。話時話，葉劉近年嘅舉動好似想走向所謂嘅「中間派」，有時貼住泛民做事，有時又同建制派企喺同一陣線，角色都好混亂喎。
每逢行會開會都有唔少團體到場示威，正所謂「家家有求」。不過，喺尋日嚴寒嘅天氣下，葉劉特登早半個鐘頭去到特首辦門外嘅示威區，聯同「愛將」南區區議員陳家珮一齊舉牌，要求政府唔好縮減東區醫院嘅緊急中風治療服務。連身兼行會成員嘅佢都要喺示威區請願表達訴求，政府真係「一視同仁」嘞！葉劉就話唔覺得自己作為行會成員嚟示威有乜嘢衝突，又話事前已經通知咗咁話。其實，陳家珮有意出戰立法會港島區補選，為求幫愛將增曝光率同提高知名度，葉劉竟然願意由尊貴嘅行會成員變做示威者，可見佢去得幾盡。
早前突撐泛民查領展
除咗行會示威外，佢仲同非建制派「行埋」添！話說佢喺舊年年底突然爆出因為批評領展而被人恐嚇，當泛民主派喺修改《議事規則》嘅大會上「玩嘢」提呈請書，要求成立專責委員會調查領展拆售商場事宜，分屬建制派嘅葉劉竟然「玩埋一份」，同非建制派一齊站立支持，但係佢就甩轆叫唔郁黨友容海恩一齊企起身。葉劉仲話會就個調查委員會同泛民主派傾，睇吓有冇得做主席或者副主席。
補選爭位爆建制內訌
同非建制派有傾有講，但喺舊年十一月中西區區議會山頂選區，因為原議員、自由黨陳浩濂做財經事務及庫務局副局長要搞補選，葉劉又玩自爆要披甲上陣，仲暗批有人辜負選民期望，擺明要同自由黨競爭，自由黨嘅高層亦暗批葉劉踩隻腳入去，幾番隔空駁火後，最後唔知係咪為咗免得畀泛民「偷雞」，葉劉後尾都無參加補選，自由黨嘅楊哲安成功當選，但過程中又暴露咗建制派為搶位而內訌嘅一幕。
為咗幫愛將造勢，葉劉由行會成員變咗示威者，之前為咗狙擊領展又靠近泛民，為咗鋪路選俗稱嘅立法會超級區議會功能界別，又同建制派搶位，角色咁混亂，真係有啲踩鋼線喎。