港產官僚冇嘢叻，最叻係卸膊。政府近年不斷將服務外判，結果唔使問阿貴，就係責任跟手外判埋出去，自己就翹埋雙手，關人個關，工人被剝削？你死你賤喇！
最近長沙灣海麗邨一批外判清潔工人被拖欠遣散費，工會同工人好自然走去搵房署幫手，點知對方求其派幾個職員到場接信就算，署長應耀康一直閉門謝客，示威者喺門口放道具諷刺佢老哥「龜縮」又點吖，大丈夫一言九鼎，話唔見人就唔見人，你吹得我脹？講開呢位署長大人，之前鉛水風波被立法會政府帳目委員會點名「極度遺憾」，一樣可以好官我自為之，「區區」外判工人被拖欠遣散費呢啲「碎料」，點可能驚動佢老人家吖。
講真，如果唔係事件引發傳媒關注，迫於輿論壓力，資方都未必肯坐埋枱同員工傾解決辦法，官僚靠得住，豬乸會上樹，就係咁解。有人建議當局同外判商簽訂合同時，要求喺合約內規定預留款項作遣散費，以及僱傭合約完結時須向員工支付相關費用；同時將外判商嘅扣分範圍擴大至勞資糾紛等。上述建議聽落幾可行，但恐怕都係對牛彈琴。官老爺起勢搞外判目的就係想慳水慳力，掉番轉頭叫佢哋加強監管，自己攞苦嚟辛，慳番啖氣暖肚好過。
呢嗱，數字冇花冇假。有工會表示，淨係過去三年處理嘅政府外判工被拖欠遣散費或長期服務金嘅個案，就涉及近一千名清潔工人及保安員、共一千四百多萬元，可見海麗邨事件只係冰山一角。幾年前康文署轄下公共圖書館外判商突然拉閘走數，最少五百名員工受影響，幾乎年關都過唔到，康文署居然事不關己，連墊支都耍手擰頭，仲有冇再涼薄啲吖。
當局放任自流，咁就難怪部分無良外判商有恃無恐，諗盡各種招數剝削工人。有啲外判商名字相近，同一地點辦公，擺明圍威喂有景轟。有行內人士踢爆，唔同公司間以「一條龍」、「左手交右手」方式承接屋邨維修、清潔以及保安等合約，再以轉新公司為藉口，重新計算員工工齡，從而慳番大假及請替工等開支，諗縮數諗得咁盡，唔到你唔服。
咪以為淨係無良商人唯利是圖，港府坐擁金山銀山，一樣好意思喺乞兒兜揦飯食。早排康文署為咗減省十元八塊成本，主動要求清潔外判商削減原本用於「交更」嘅十五分鐘工時，就係典型例子。
難為班高官開口埋口關懷弱勢，家陣呢班外判工正正就係弱勢中嘅弱勢，佢哋為求自食其力，寧願忍受不堪嘅待遇都唔攞綜援，政府保護不力之餘仲要帶頭壓榨，點止失職，直頭冷血！