新任律政司司長鄭若驊尋日正式上任，坊間原本以為其上任首要挑戰，應該係高鐵西九龍站實施一地兩檢嘅本地立法，以及處理違法佔領行動中多名搞手嘅檢控工作，點知偏偏上任首日就爆出僭建風波，真係一上場就「仆低」甩晒轆。雖然鄭若驊過去一向鮮談政治，但回歸多年出現過唔少高官捲入僭建醜聞，反映鄭若驊嘅政治敏感度過分不足。不過，就算佢政治敏感度不足，政府事前做審查都應該注意到或提醒吓佢啩，好過依家上場脫腳，司長都其身不正，點樣令市民對司法及刑事檢控有信心呢？
