政情：麥美娟原來係工記鬧交王
工聯會（工記）立法會議員麥美娟（Alice）喺上屆立法會同黨友離島區議員鄧家彪（Bill）合作無間，其實佢哋連飲食口味都同樣合拍，皆因好食得辣。Alice尋日喺Facebook上載同阿Bill同另外兩名工記成員去「私竇」食辣嘅片段，原來Alice名副其實係一名「辣妹」，除咗食得辣，阿Bill仲大爆Alice係工記中鬧交最叻嘅代表，笑指鬧交工作都分畀Alice負責。
Alice就話，身邊朋友都形容佢「鬧交未輸過，打交未贏過」，連工聯會榮譽會長陳婉嫻都話搵Alice同人鬧交實掂，工記有個鬧交王，睇嚟大家都要避免同Alice舌戰喇！
同鄧家彪辣鬥辣
講番食辣，Alice就話自己遺傳到父親食辣嘅口味，加上細個有逞強心態，想叻過食唔到辣嘅哥哥，所以就經常食辣，由細就開始鍛煉食辣，難怪佢無辣不歡，鬧交都咁有火氣。至於阿Bill都自爆有「辣不怕」嘅花名，佢話除咗食得辣，工作同樣都要做得辣喎。