政情：擴票源爭認孭案 泛民初選爛鬥爛

張秀賢喺尋日嘅新東初選論壇展示咗另類搶票手法，佢發言時自爆係民主派兩區合共六名初選參選人中，唯一有案在身，所以最能代表被捕抗爭者；又話如果成功當選，會捐出一半人工支持在囚抗爭者，明顯係想取得本土派嘅支持。

同樣主打本土派嘅范國威唔執輸，聲稱自己喺違法佔領行動中被預約拘捕，反駁張秀賢唔係唯一涉案者，一於鬥「抓爛塊面」。唔通呢招就係早前公民黨議員楊岳橋所講，「有案底會令人生變得更精彩」，覺得咁就會得到本土派及市民支持？

范國威郭永健互翻舊帳

除咗互鬥有案在身，范國威亦向有意喺新東出選嘅工黨主席郭永健挑機，翻舊帳話對方早年喺「左翼21」時提出，要私家醫院繼續接收雙非嬰兒，同目前取態唔同。郭永健未有正面回應，只係否認並非「左翼21」發言人，但就「以彼之道還施彼身」，指出范國威喺六年前曾簽署聲明支持向新移民派六千港元，後來又反對新移民湧港，質疑對方取態左搖右擺。

一輪「疊聲」爭論後，郭永健向范國威拋下一句：「係你嘅問政風格令你四面楚歌」，直指對方喺政界無朋友，似乎都幾一針見血咁喎。

馮檢基：打自己人仲重手

至於九龍西方面，就由原屬建築、測量、都市規劃及園境界嘅立法會前議員姚松炎同民主黨深水埗區議員袁海文，夾擊民協立法會前議員馮檢基，指民協喺九龍西立法會選舉得票率一屆不如一屆，質疑馮檢基嘅勝算。連作為嘉賓嘅學者都加入圍攻，指馮檢基年紀大，點解仲要參選？馮檢基就不斷話唔應有年齡歧視，又話立法會內唔需要人人係前鋒，都需要佢呢類負責傳送同後勤嘅中場喎。由於全場捱打，馮檢基最後都頂唔住求饒，話「唔好打自己人仲重手過打民建聯」，叫政治盟友下手輕啲。

各參選人喺初選論壇用大部分時間互相攻擊，為咗爭取唔同政治光譜又不惜鬥爛，搞到論壇成場泥漿摔角咁，會唔會反而令到市民反感呢？