中環出更：何君堯又開火 喪鬧泛民青政
立法會財務委員會尋日召開特別會議，處理修訂財委會同轄下工務及人事編制小組委員會《會議程序》嘅議案。向來語出驚人嘅議員何君堯喺發言時又再嚟料，斥責民主派由議員宣誓就職開始，「只係搞一樣嘢，就係反中亂港」，只識「打爛沙盆問到篤」拉布同「最叻點人數」，又指建制派辛苦通過修改《議事規則》，民主派係「自毀長城」，質疑民主派「幫香港人做乜？沉淪呀？」
陳健波話民主派折磨主席
何君堯又不點名指青年新政游蕙禎同梁頌恆喺立法會宣誓時宣揚港獨係「一條懵佬、兩條懵佬講港獨」，惟民主派唔敢批評兩人宣揚港獨。會議上，民主派則主力圍攻主席陳健波，包括指陳不斷創造慣例，變成「陳健波lization（陳健波化）」，又批評陳「濫權慣」，經常喺議員發言時「斬議員時間」。
陳健波就反擊話，如果民主派係都要折磨主席，令主席性格改變，咁唔係好事，又話如果民主派議員做主席，大家一早就冇得發言喇。
卓妮