中環出更：老行尊想當年 金舖養狼狗看門口
農曆新年臨近，唔少人都會買番啲金飾過年添吓喜氣，所以金舖喺年尾特別旺，不過表面睇落風光，其實背後嘅保安問題都幾緊張。早前卓妮喺馬場見到珠寶金飾業老行尊黃偉常，佢細數以前「古法」防賊，包括喺舖頭養大狼狗，飾櫃上仲裝有鐵欄，諗起都幾搞笑。
黃偉常話，珠寶業幾十年嚟變化好大，以前飾櫃有鐵欄，但係依家既冇需要，又唔美觀，所以已經好難見到呢啲場景。黃偉常嘅兒子黃浩龍、女兒黃蘭詩細細個經常喺舖頭玩，黃浩龍就話，當年不時有人持械行劫，所以舖頭都養咗兩隻大狼狗「看門口」，佢完全唔識驚，兩、三歲已經成日騎住佢哋玩，好彩兩隻大狼狗都好乖，冇咬佢喎！
黃蘭詩曾親歷舖頭被劫
黃蘭詩就親身經歷過金舖被打劫，好彩當時佢太細個，企咗喺飾櫃後面，賊人根本就睇唔到佢，最終總算平安無事。
講到呢行最大嘅變化，黃偉常就話係營業時間，依家金舖日日開，以前業界有個不成文共識，就係年初一至初三休息，初四營業，不過黃偉常就自爆試過偷步喺初三開市喎。佢又話，由於初一要休息，所以除夕就好忙，試過做到凌晨三點添！
梁君彥見過營業到半夜
卓妮真係未見過金舖開到半夜，但同場嘅立法會主席梁君彥就作證話，佢細個嘅時候爸爸喺除夕都好忙，收工時通常都未食飯，所以就會帶佢出去食消夜、買新衫，同埋買啲珠寶首飾畀媽咪過年，所以佢都見過金舖開到半夜三更，佢真係見過！
卓妮