立法會修改《議事規則》之戰已經完結，但就留低咗一堆戰後後遺。話說民主派之前為咗拖延修改《議事規則》，就出「怪招」引用《基本法》同《議事規則》條文，提出咗十七項議員議案拉布。不過點知怪招拖延修規不成，反被安排喺修規後處理。而呢十七項議案並唔阻礙政府提交法案，但議員想再提出新議案就有排等喇！民主派有人就想撤回怪招以免阻住自己，今日佢哋就要商討點處理喇！
民主派根據《基本法》第七十三條及《議事規則》第四十九條提出十七項議案，包括就不同重要社會議題傳召政府問責官員，以及譴責包括立法會主席梁君彥在內多位建制派議員。不過民主派怪招都係志在拉布，依家事過境遷，民主派有人就想撤回呢啲拉布議案，其中民主黨已考慮撤回部分議案，包括由該黨尹兆堅提出嘅譴責何君堯議案。
不過怪招都唔係想撤就撤，事關民主派對是否撤回怪招都有意見分歧，其中屢出不同怪招拉布嘅議員朱凱廸就講明，因為呢啲議案並非純為拖延修規提出，都係市民關心嘅議題，加上並唔影響政府喺新一年提交法案，所以佢唔傾向撤回。不過呢樣嘢涉及民主派新一年嘅部署，所以都係要開會討論吓先嘅。