政情：馬斐森本月離任 近九成教職員狠批表現
已辭任香港大學校長嘅馬斐森今個月離開港大，返回蘇格蘭愛丁堡大學任校長，港大教師及職員會臨別贈興，最近訪問六百零九個港大教職員，受訪者一面倒批評馬斐森嘅表現，八成六非常不同意或不同意馬斐森能捍衞院校自主、學術自由及言論自由；八成八非常不同意或不同意馬斐森嘅整體表現非常出色。港大教師及職員會主席張星煒更形容，馬斐森係歷來表現最差嘅港大校長。
港大教師及職員會於上月十八日至本月二日進行訪問，就馬斐森任內管理、與教職員溝通、推動港大發展幾方面了解教職員嘅意見，調查發現，除咗八成六受訪者非常不同意或不同意馬斐森能達到問責標準，近九成仲話佢未能保護校內「吹哨者」，維護研究誠信。
被指港大歷來最差校長
張星煒炮轟馬斐森提早辭職另謀高就極之唔負責任，「教壞學生」，形容馬斐森不論對外對內表現都一團糟，「我喺港大做咗廿幾年，佢（馬斐森）係最差嘅校長」。
另外，中文大學新任校長段崇智尋日會見傳媒時，被問及大學校園能否討論港獨，佢話大學已有明確措施處理，並會捍衞學術同言論自由，希望大家以和平同理性嘅方式討論。