政情：怕變翻版貪湯 司局長收酒唔留
政治委任官員及其配偶藉其身份收受禮物或利益等，都必須記錄在案。本報翻查新一屆問責官員上任以來嘅收禮紀錄，發現唔少司局長都收到「騎呢禮物」，例如魚蛋、米、搓手液同保溫瓶等，多名司局長亦收到酒，包括政務司司長張建宗、財政司司長陳茂波（波叔）同食物及衞生局局長陳肇始，但佢哋就完全唔敢保留，睇嚟都相當小心，唔知係咪怕被人話係「翻版貪湯（前廉政專員湯顯明）」呢？
波叔收逾百禮物 只留八份
波叔係收得最多禮物嘅問責官員，佢一共收到逾一百份禮物，但保留嘅數目就只有八份，例如一件模擬上市交易員背心，相信係喺港交所交易大堂Last Day收到(口架)嘞！佢亦收到好多騎呢禮物，冇打算保留，包括有三對耳塞同一對護腕，每個人都只有一對耳仔，唔知送足三對耳塞畀佢，係咪有乜嘢玄機(口架)呢？
可能因為環境局同天然環境關係密切，局長黃錦星不時都收到啲令人訝異嘅禮物，例如早兩年曾經收到一杯泥，今次佢就收到四包米、天然蚊怕水同蜂蜜切片紅參，但無論係平係貴，佢都完全冇保留自用。至於保安局局長李家超就收到一包魚蛋，而商務及經濟發展局局長邱騰華就收到一個頭盔，因乜解究？
部分高官都收到酒做禮物，例如波叔收到香檳同清酒、陳肇始收到清酒同干邑、張建宗都有收到香檳等等，不過就完全冇人保留。講起高官同酒，真係不禁令人諗起「貪湯」前廉政專員湯顯明被揭「豪使」公帑狂買茅台等烈酒事件，瓜田李下，高官同酒扯上關係都並非好事，睇嚟現屆高官都相當小心。
陳肇始只敢留酒精搓手液
不過，陳肇始就係唯一一個高官有保留酒類物品。唔好誤會，唔係飲用嘅烈酒嚟，佢只係二十支六十毫升嘅酒精搓手液，呢份仲係佢唯一一份有保留嘅禮物添！
波叔收得最多禮物，但唔好以為財金官員就一定收禮收得多，原來財經事務及庫務局局長劉怡翔係收得最少禮物嘅問責官員，據知該局出席活動前，都會事先向主辦單位講明唔收禮物同紀念品，唔知係咪因為劉怡翔日常處理咁多市場敏感資訊，所以事先特別注重觀感呢？而張建宗、勞工及福利局局長羅致光等數名高官，完全冇保留任何一份禮物，真係小心駛得萬年船呀吓！