中環出更：虛擬貨幣成主流？趙麗娟話機會唔大
虛擬貨幣漸漸滲入現實生活領域，除咗進身期貨市場如同真實商品般買賣之外，某大會計師事務所亦稱接受客戶以虛擬貨幣嚟支付諮詢服務嘅費用。到底將來虛擬貨幣係咪可以一如現金，成為主流嘅交易媒介呢？香港會計師公會前會長趙麗娟就話機會唔大，因為大眾對虛擬貨幣嘅認受性有保留。
趙麗娟話某大會計師事務所之所以接受虛擬貨幣，可能係擁有虛擬貨幣嘅庫存以方便環球投資。雖然虛擬貨幣未必可以廣泛流通，但唔代表現金嘅地位不可動搖，因為電子支付實在太方便。
潘偉業覺得認受性存疑
佢話自己到內地公幹，只需一部手機同後備電池就完成好多交易，同樣情況若喺香港發生，就可能要撳多幾次櫃員機啦！雖然目前港人對電子支付嘅態度係比較保守，但佢話早前喺香港搭的士，發覺的士司機已接受手機繳付車資以免除現金找贖，所以佢認為只要操作方便，毋須官方推動民間亦會採用電子支付。
咁本港嘅工商界又會唔會同意客戶以虛擬貨幣找數呢？菁英會會員潘偉業就話唔會，因為佢對虛擬貨幣唔係太理解，加上對虛擬貨幣嘅認受性存疑，因此廣泛使用虛擬貨幣交易嘅日子，相信未來幾年都唔會出現。佢又認為虛擬貨幣身價上漲唔少，係太多投資者追逐所致，但係咪真係咁值錢則屬另一問題。
史昊洺指欠監管唔放心
香港青年工業家協會青委會主席史昊洺就話虛擬貨幣背後無實物支撐，又欠缺政府監管，有機會淪為不法分子洗黑錢嘅途徑，又話虛擬貨幣令人唔放心嘅地方太多，目前好多生意人都未有勇氣接受。香港工業總會青年委員會名譽會長劉燊濤就話自己做實業，梗係要收現金喇！
卓妮